निकाल लागायच्या आधीच विपरीत घडलं! निकालाच्या भीतीने बारावीच्या तरुणाचे टोकाचे पाऊल; मलकापूर हादरले....
Updated: May 2, 2026, 13:48 IST
मलकापूर (बुलडाणा लाइव्ह वृत्तसेवा): बारावीच्या निकालाच्या तणावातून एका १९ वर्षीय विद्यार्थ्याने आत्महत्या केल्याची हृदयद्रावक घटना मलकापूर शहरातील आकोरेश्वर नगर परिसरात घडली आहे. या घटनेमुळे संपूर्ण परिसरात शोककळा पसरली असून, विद्यार्थ्यांच्या मानसिक आरोग्याचा प्रश्न पुन्हा एकदा ऐरणीवर आला आहे.
मृतक साहिल संजय राणे (वय १९) हा उच्च माध्यमिक शाळेत बारावीचा विद्यार्थी होता. शनिवारी, २ मे रोजी बारावीचा निकाल जाहीर होणार असल्याने तो गेल्या काही दिवसांपासून प्रचंड तणावाखाली होता. “निकाल कसा लागेल? अपेक्षेप्रमाणे गुण मिळतील का?” या चिंतेने तो व्याकुळ झाला होता. हीच भीती इतकी वाढली की, त्याने टोकाचा निर्णय घेत स्वतःचे जीवन संपवले.
शुक्रवारी (१ मे) सकाळी साडेअकराच्या सुमारास, घरातील सदस्य बाहेर असताना साहिलने आपल्या बेडरूममध्ये पंख्याला दोरीच्या सहाय्याने गळफास घेतला. ही घटना उघडकीस आल्यानंतर वडील संजय भास्कर राणे यांनी तत्काळ नातेवाईकांना माहिती दिली. काका राजेंद्र राणे यांनी घटनास्थळी धाव घेतली. मात्र तोपर्यंत उशीर झाला होता.
माहिती मिळताच मलकापूर शहर पोलिसांनी घटनास्थळी पोहोचून पंचनामा केला. या प्रकरणी आकस्मिक मृत्यूची नोंद करण्यात आली असून, पुढील तपास पीएसआय बरदाडे करत आहेत.
कुटुंबावर दुःखाचा डोंगर..
साहिलचे वडील आपल्या मुलाला खोलीत लटकलेल्या अवस्थेत पाहताच हादरून गेले. कुटुंबीयांनी त्याला तातडीने खाली उतरवले, मात्र तोपर्यंत त्याचा मृत्यू झाला होता. एका हसऱ्या-खेळत्या मुलाचा असा दुर्दैवी अंत झाल्याने राणे कुटुंबावर दुःखाचा डोंगर कोसळला आहे.
मानसिक आरोग्याचा प्रश्न ऐरणीवर...
या घटनेनंतर समाजात विद्यार्थ्यांच्या मानसिक तणावाचा मुद्दा पुन्हा समोर आला आहे. बारावीचा निकाल म्हणजे आयुष्याचा शेवट नसून, अपयशावर मात करण्यासाठी संवाद आणि समुपदेशनाची गरज असल्याचे तज्ज्ञांचे मत आहे. “निकाल हा केवळ गुणांचा असतो, आयुष्याचा नाही,” हा संदेश समाजापर्यंत पोहोचवण्याची आवश्यकता अधोरेखित होत आहे.
या दुर्दैवी घटनेने पालक, शिक्षक आणि प्रशासन यांना विद्यार्थ्यांच्या भावनिक स्थितीकडे अधिक संवेदनशीलतेने पाहण्याचा इशारा दिला आहे.