शेतकऱ्यांकडून पीक विम्याचे पैसे घेतले अन्‌ बनावट पावत्या दिल्या
पोलीस सूत्रांनी दिलेल्या माहितीनुसार, जळगाव जामोद तालुक्यातील गाडेगाव खुर्द येथील शेतकरी प्रवीण सुभाषराव देशमुख यांनी २०२० च्या खरीप हंगामासाठी त्यांच्या शेतातील पिकाचा प्रधानमंत्री पीक विमा योजनेअंतर्गत विमा काढला होता. विम्याची १६०२ रुपये रक्कम त्यांनी खांडवी येथील आपले सरकार सेवा केंद्र चालविणाऱ्या मनोहर हरीभाऊ बावस्कर यांच्याकडे भरली होती. बावस्कर याने पैसे भरल्याची पावती दिली.
मात्र पैसे पीक विमा कंपनीकडे पाठवले नाही. यंदा शेतकऱ्यांना पीक विमा मिळाला. मात्र देशमुख यांना पीक विमा मिळाला नाही. देशमुख यांच्या १ हेक्टर ७८ आर शेत जमिनीचा त्यांना ८० हजार १०० रुपये विमा मिळाला असता. मात्र बावस्कर याने बनावट पावती दिल्याने देशमुख यांना विमा मिळाला नाही. देशमुख यांच्यासोबत टाकळी पारस्कर येथील वनमाला हरिभाऊ चांभारे, कैलास मुरलीधर चांभारे, वासुदेव जगदेव पारस्कार, लक्ष्मीबाई जगदेव पारस्कार, केदारनाथ पारस्कार, गाडेगाव बुद्रूकचे संदीप इटखेडे यांचेही पैसे घेऊन बारस्कार याने बनावट पावत्या दिल्या व पैसे विमा कंपनीला न पाठविल्याने शेतकऱ्यांना विमा न मिळाल्याने त्यांची फसवणूक झाली, अशी तक्रार जळगाव जामोद पोलीस ठाण्यात देण्यात आली. तक्रारीवरून बावस्करविरुद्ध फसवणुकीचा गुन्हा दाखल करण्यात आला आहे.