सत्ताधाऱ्यांनी रडीचा डाव खेळला! जालिंधर बुधवंत असेल किंवा नसेल पण सभापती उद्धव ठाकरेंच्या शिवसेनेचाच होईल! अर्ज नामंजूर झाल्यानंतर जालिंधर बुधवंतांची प्रतिक्रिया! म्हणाले,निवडणूक अधिकाऱ्यांवर दबाव..

यावेळी बुधवंत म्हणाले की, अर्जासोबतच सहा महिन्यांआधी व्यापारी म्हणून असलेले माझे लायसन्स रद्द केल्याचा पुरावा जोडला होता. त्याबाबत बाजार समितीच्या ठरावाची प्रतही अर्जासोबत जोडली होती. रितसर सगळे पुरावे जोडल्यानंतरही मतदारयादीत नाव कसे आले? हे जिल्हा उपनिबंधक व तत्सम प्रशासनाने ठरवावे. त्यात आमचा काय दोष? जिल्हा प्रशासनाकडून मागच्या महिन्यात किंवा आधीदेखील काही मृत अधिकारी, कर्मचाऱ्यांची नावे बदल्यांच्या यादीत आली होती. त्याला दोषी कोण होते? असे प्रकार होत असतात. मात्र, अर्ज छाननीच्या वेळेस नियम, कायदा मोडीत काढून कोणाच्यादबावात अधिकाऱ्यांनी अर्ज रद्द केला, हा खरा संशोधनाचा विषयआहे. या विरोधात आम्ही रितसर अपील दाखल केले आहे.
न्यायासाठी आमचा लढा सुरू राहील, असेही त्यांनी सांगितले. 

लोणारमध्ये अर्ज मान्य, बुलढाण्यातच वेगळा न्याय कसा ?

लोणारात उरफाटा न्याय केल्याचे सांगत बुधवत म्हणाले, लोणार येथील बाजार समिती निवडणुकीत सत्ताधारी गटाच्या बळीराम मापारी नावाच्या उमेदवाराचे व्यापारी व सोसायटी मतदारसंघातून अर्ज भरण्यात आले होते. शिवसेनेने आक्षेप घेतल्यानंतरही तेथे निवडणूक निर्णय अधिकाऱ्यांनी मापारी यांचा व्यापारी मतदारसंघातील अर्ज रद्द ठरवला, पण त्याचवेळी सोसायटीमधील अर्ज कायम ठेवला. लोणार येथे वेगळा कायदा आणि बुलढाण्यात वेगळा कायदा आहे का? जिल्हा उपनिबंधकांनी तालुकास्तरावर नेमलेल्या अधिकाऱ्यांना वेगळे अधिकार दिले आहेत काय? बुलढाण्यात माझ्या अर्जासोबत लायसन्स रद्द केल्याची सहा महिन्यापूर्वीच पोच आणि बाजार समितीचा ठराव हे दोन्ही पुरावे सोबत जोडलेले असताना अर्जच बाद करण्यात आला, हे कसे काय होऊ शकते. माझा तर एकाच मतदारसंघात अर्ज होता, मग बुलढाण्यात वेगळा न्याय काय? यासाठी कुणाचा दबाव होता? असा प्रश्न बुधवत यांनी पत्रकारांसमोर उपस्थित केला.

सभापती शिवसेनेचाच होईल..!

मी बाळासाहेबांचा शिवसैनिक असून पक्षप्रमुख उद्धव ठाकरे यांच्या मार्गदर्शनात संयमाने आम्ही काम करतोय. शिवसेनेचा भगवा फडकवण्यासाठी मीच उमेदवार असलो पाहिजे, असे नाही. मासरूळ हा जिल्हा परिषदेचा शिवसेनेचा गड आहे. त्या मतदारसंघात मी फक्त एकवेळ निवडणूक लढवली, तीदेखील माझी अर्धांगिनी त्या ठिकाणी महिला राखीव असल्याने लढली.त्याआधी जेही उमेदवार उभे केले, त्यांना निवडून आणण्याची जबाबदारी शिवसेना म्हणून आमचीच होती. त्यामुळे आता या बाजार समितीच्या निवडणुकीत समोरासमोर लढायची हिंमत नसल्याने अशा आडकाठी आणत विरोधकांनी रडीचा डाव खेळला आहे. जालिंधर बुधवंत  उमेदवार असेल किंवा नसेल,पण सोबत असलेली महाविकास आघाडी जिंकणार आणि शिवसेनेचाच सभापती होईल, ही काळ्या दगडावरची रेष असल्याचा दावाही जालिंदर बुधवत यांनी यावेळी केला..
याप्रसंगी माजी सभापती सुधाकर आघाव, तालुकाप्रमुख लखन गाडेकर, सुनील गवते, राजू मुळे, विजय इतवारे, गजानन उबरहंडे, जिल्हा प्रवक्ता गजानन धांडे उपस्थित होते.