संदीप शेळकेंचा मेहकर, डोणगाव येथील रोडशो ठरला सुपरहिट! प्रचारही जोमात; म्हणाले, सामान्यांचा आवाज दिल्लीच्या तख्तावर बुलंद करायचाय; प्रस्थापित नेते स्वतःला राजे समजत असल्याचा आरोप...

बुलडाणा(बुलडाणा लाइव्ह वृत्तसेवा) तुम्ही इतकी वर्ष झाली प्रस्थापित नेत्यांना मते दिले. परंतु ते स्वतःला राजे समजायला लागले आहेत. सामान्य जनतेकडे पाहायला त्यांना वेळ मिळत नाही. फक्त निवडणूक आली की जनतेजवळ यायचं आणि मतं मागायची. त्यांनी कधी विकासाची भाषा केली नाही, स्वतःच्या हितासाठी ते निवडणूक लढवत आले आहेत. अशा शब्दात अपक्ष उमेदवार संदीप शेळके यांनी विरोधकांचा खरपूस समाचार घेतला. आणि वन बुलढाणा मिशनच्या माध्यमातून सामान्यांचा आवाज दिल्लीच्या तख्तावर बुलंद करायचा आहे असे प्रतिपादन केले. काल शुक्रवार, १९ एप्रिलला संदीप शेळके यांच्या प्रचारासाठी मेहकर, डोणगाव येथे रोडशो काढण्यात आला होता. यावेळी प्रचंड प्रमाणात सामान्य जनता सहभागी झाल्याने रोडशो सुपरहिट ठरला, अन् संदीप शेळके यांचे भाषणही वादळी ठरले.