रविकांत तुपकरांच्या
डोक्यात काय? उद्या बोलावली शेतकऱ्यांची महत्त्वाची बैठक..
Feb 24, 2025, 13:08 IST
बुलडाणा(बुलडाणा लाइव्ह वृत्तसेवा): शेतकरी नेते रविकांत तुपकर यांनी उद्या,२५ फेब्रुवारीला बुलढाण्यात महत्त्वाची बैठक बोलावली आहे. क्रांतिकारी शेतकरी संघटनेचे जिल्हाभरातील प्रमुख पदाधिकारी, कार्यकर्ते आणि शेतकऱ्यांची या बैठकीला उपस्थिती राहणार आहे. उद्या रविकांत तुपकर नेमके काय बोलणार? शेतकऱ्यांच्या प्रश्नांवर कुठल्या वेगळ्या आंदोलनाची घोषणा करणार का? याकडे सगळ्यांचे लक्ष लागून आहे. बुलढाणा शहरातील चिखली रोडवरील हॉटेल शिवगड (जुने गोलांडे लॉन्स) इथे सकाळी १० वाजता या बैठकीला सुरुवात होणार आहे..
शेतकऱ्यांच्या विविध मागण्या, समस्या आणि त्यासाठीचे आंदोलन या संदर्भात रविकांत तुपकर सरकारवर काय आसूड ओढतात याकडेही माध्यमांसह शेतकऱ्यांच्या नजरा लागून आहेत. शेतकऱ्यांच्या हक्काचा पिक विमा, सोयाबीन कापूस भावफरक, नाफेड मध्ये अडकलेली शेतकऱ्यांची रक्कम, रखडलेले अनुदान यासह इतर विषयांवर या बैठकीत चर्चा होणार आहे. पिक विमा आणि इतर मागण्यांसाठी रविकांत तुपकर यांनी यापूर्वीच मोठे रणकंदन केले आहे. राज्याचे कृषी आयुक्त, कृषी प्रधान सचिव, कृषिमंत्री, पालकमंत्री, उपमुख्यमंत्री तसेच थेट मुख्यमंत्र्यांची भेट घेऊन देखील रविकांत तुपकर यांनी शेतकऱ्यांचे प्रश्न लावून धरले आहेत. काही दिवसांआधी त्यांनी अरबी समुद्रात सोयाबीन फेकण्याचा इशारा दिला होता, त्या पार्श्वभूमीवर उद्या होणारी बैठक महत्त्वाची ठरणार आहे...