रविकांत तुपकरांच्या २२ वर्षाच्या संघर्षाची लढाई निर्णायक टप्प्यावर! सामान्य शेतकरी कुटुंबात जन्म ते राज्याच्या शेतकरी चळवळीचा चेहरा! तुपकरांचा हा प्रवास सोपा नव्हताच..!

बुलडाणा(बुलडाणा लाइव्ह वृत्तसेवा): पैशातून सत्ता, सत्तेतून पैसा आणि त्याच पैशातून पुन्हा पुन्हा सत्ता ही भारतीय लोकशाहीला लागलेली कीडच म्हणावी लागेल..राजकारण आता केवळ पैसेवाल्यांच काम झालंय अस बोलणारी माणसं कमी नाहीत, "छे.. छे शेतकऱ्याच पोरगं कुठं नेतृत्व करू शकत काय? ते आपल काम नव्हं, बैल दावणीला जुपाव अन् वावरात मुकाट्यानं काम करावं ह्योच आपला पिढीजात धंदा..ते लोक आपल्याला तिथं टिकू द्यायचे नाहीत.." शेतकऱ्याच्या पोराच्या घरात राजकारणाचा विषयही निघाला तरी घरातल्या मोठ्यांचे हे शब्द ठरलेले..मात्र परिस्थिती कितीही प्रतिकूल असली तरी काम करण्याची प्रामाणिक तळमळ, कामाप्रती असलेली श्रद्धा त्या प्रतिकुलतेवर मात करण्याची शक्ती नक्कीच देते..सामान्य शेतकरी कुटुंबात जन्म ते राज्याच्या शेतकरी चळवळीतील मोठे नेतृत्व, ज्यांच नुसत नाव ऐकल तरी शेतकऱ्यांना लुटू पाहणाऱ्या अधिकारी,नेत्यांची घाबरगुंडी उडते ते म्हणजे रविकांत तुपकर यांच्या बाबतीत वरील सर्व बाबी लागू होतात. रविकांत तुपकर यांचा आजवरचा हा प्रवास सोपा नव्हताच.प्रचंड संघर्ष म्हणजे काय असत तर ते रविकांत तुपकरांच्या आजवरच्या प्रवासाकडे पाहून कळेल..अर्थात हा संघर्ष स्वतःसाठी नव्हताच, स्वतःच्या लेकरा- बाळांसाठी, संसारासाठी नव्हता. तो होता, जगाचा पोशिंदा असलेल्या कष्टकरी गोरगरीब शेतकऱ्यांना त्यांच्या घामाचे दाम मिळावे म्हणून.. तुपकरांचे हेच वेगळेपण त्यांना इतर राजकीय नेत्यांपेक्षा वेगळे ठरवते अन् त्यामुळेच तुपकरांच्या एका हाकेवर हजारो शेतकरी, तरुण, माय - माऊल्या एका ठिकाणी एकत्र येतात..संघर्षातून पुढे येत राज्याच्या शेतकरी चळवळीतच नव्हे राज्याच्या राजकारणात स्वतःचा ठसा उमटविणाऱ्या रविकांत तुपकरांचा हा संघर्षाचा लढा आता बुलढाणा लोकसभा निवडणुकीच्या निमित्ताने निर्णय टप्प्यावर येऊन पोहोचला आहे. एकीकडे माणसं जमवण्यासाठी उमेदवारांना करावी लागणारी धडपड आणि दुसरीकडे तुपकर यांना प्रचारात मिळालेला अभूतपूर्व प्रतिसाद, प्रचंड गर्दी ही तुपकर यांच्या २२ वर्षाच्या संघर्षाची पावती म्हणावी लागेल. रविकांत तुपकर म्हणजेच संघर्ष अशी व्याख्या व्हावी इतपत या लढवय्या माणसाचा संघर्ष आहे.