रविकांत तुपकर घाटावर जिंकले पण घाटाखाली हरले! घाटावरच्या ४ मतदारसंघात तुपकरांना १० हजार ९७९ मतांचे मताधिक्य; खा. जाधवांपेक्षा १६०८३ मते जास्त! घाटाखाली "गेम" झाला..

बुलडाणा(बुलडाणा लाइव्ह वृत्तसेवा): बुलडाणा लोकसभेची निवडणूक यंदा अंत्यंत चुरशीची झाली. खा.प्रतापराव जाधव सलग चौथ्यांदा खासदार झाले असले तरी यंदा त्यांचे मताधिक्य घटले. एवढेच काय तर गत निवडणुकीत सहाही विधानसभा मतदारसंघात आघाडी घेणाऱ्या खा. जाधव यांना यंदा केवळ खामगाव आणि जळगाव जामोद मध्ये आघाडी मिळाली, मेहकर मध्येही ते आघाडीवर राहिले मात्र ती आघाडी केवळ २४३ मतांची होती. खामगाव आणि जळगाव जामोद या घाटाखालच्या दोन विधानसभा मतदारसंघाच्या भरवश्यावर विजय साकारणारे खा.जाधव घाटावरच्या मेहकर, सिंदखेडराजा , चिखली, येथील बुलडाणा या मतदारसंघांमध्ये पडलेल्या मतांच्या बेरजेत तिसऱ्या क्रमांकावर दिसतात. विशेष बाब म्हणजे घाटावरच्या ४ विधानसभा मतदारसंघाची बेरीज केली तर शेतकरी नेते रविकांत तुपकर अव्वल ठरतात. घाटावर नरेंद्र खेडेकरांपेक्षा १० हजार ९७९ आणि खा.जाधव यांच्यापेक्षा १६०८३ इतकी मते घेत आघाडी घेणाऱ्या तुपकरांना घाटाखाली अपेक्षित यश मिळाले नाही. एवढेच नव्हे तर घाटावर पिछाडीवर असणाऱ्या खा.जाधव यांनी घाटाखालील दोन मतदारसंघात तब्बल १ लाख ५० हजार ८६५ इतकी मते घेत विजयावर शिक्कामोर्तब केले. त्यामुळे तुपकर घाटावर जिंकले पण घाटाखाली हरले असाही एक अर्थ या निवडणूक निकालातून निघत आहे.