तिसऱ्या टप्प्यात वाढला वेग! खामगावची शंभरी!!

शेगाव, जळगाव जामोद नव्वदीच्या पल्याड; मलकापूर, नांदुरा, लोणारचे सदस्य बाहेर पडेना

By News Desk Dec 10, 2021, 15:22 IST

बुलडाणा (विशेष प्रतिनिधी ः बुलडाणा लाइव्ह वृत्तसेवा) ः पहिल्या टप्प्यादरम्यान मेसेज न मिळाल्याने थंडावलेल्या मतदानाने "अपेक्षापूर्ती' झाल्यावर मात्र कमालीचा वेग घेतला! तिसऱ्या टप्प्यात उत्साही मतदानाची नोंद झाली असून, दुपारी 2 वाजेपर्यंत तब्बल 140 मतदारांनी मतदान केले. दुपारी 12 वाजेपर्यंत शून्यावर असलेल्या खामगावने थेट शंभरी गाठली! संपूर्ण मतदारसंघात सर्वप्रथम शंभर टक्के मतदान झालेले हे पहिले केंद्र असून, शेगाव, जळगाव जामोदने नव्वदीचा आकडा पार केलाय! या तुलनेत मलकापूर, नांदुरा व लोणार मधील सदस्य दुपारी 2 पर्यंतही मतदानासाठी बाहेर पडलेच नसल्याचे धक्कादायक वृत्त आहे.

विधान परिषदेच्या या निवडणुकीसाठी दुपारी 2 वाजेपर्यंतच्या टप्प्यात 140 सदस्यांनी मतदान केले. यात 67 पुरुष तर 73 महिलांचा समावेश आहे. खामगावमधील सर्वच म्हणजे 37 नगरसेवकांनी मतदान केले. शेगावमध्ये 90.63 टक्के (32 पैकी 29 मतदार जणांचे) मतदान पार पडले. जळगाव जामोदमध्ये 21 पैकी 20 जणांनी मतदान केल्याने हा आकडा 95.24 टक्केच्या घरात पोहोचला. बुलडाणा केंद्रावर 35 (34 टक्के), चिखलीत 14(46 टक्के), सदस्यांनी मतदान केले.

3 ठिकाणी भोपळाच : 3 केंद्रांवर नाममात्र मतदान
दरम्यान, दुपारी 2 वाजेपर्यंत मलकापूरमधील 32, लोणार 20, नांदुरामधील 26 सदस्य मतदान केंद्राकडे फिरकलेच नाय! पालकमंत्र्यांच्या बालेकिल्ल्यातील देऊळगाव राजा व सिंदखेड राजात प्रत्येकी दोघांनीच मतदान केलं. मेहकर केंद्रावर एकमेव मतदानाची नोंद आहे. यामुळे ताळमेळ न जमल्याने सदस्यांचा केंद्रात मेळ जमला नसल्याची मजेदार चर्चा रंगली! 2 वाजेपर्यंत केवळ 38 टक्केच मतदान झाल्याने, ताळमेळ जमल्यावरच शेवटच्या 3 तासांत धो धो मतदान होईल असा रागरंग आहे.