जिल्ह्यात लवकरच कॉमन फॅसिलिटी सेंटर उभारणार; बचतगटांच्या विक्री केंद्राचे बांधकामही लवकर पूर्ण करून घेणार! खासदार प्रतापराव जाधवांचा शब्द!

चिखली/शेगाव(बुलडाणा लाइव्ह वृत्तसेवा): महिला बँकेकडून घेतलेले कर्ज वेळेत फेडतात. कर्ज त्या कधीही बुडवत नाहीत. मात्र घेतलेल्या पैशातून जो उद्योग उभा करतात त्याचे उत्पादन दर्जेदार असूनही महिला बचत गटांच्या मालाला विक्री व्यवस्था व विपणन प्रणाली नसल्यामुळे महिलांचे उद्योग बंद पडतात किंवा विस्कळीत होतात. मात्र आता या समस्येवर आपण तोडगा काढला आहे. जिल्ह्यात यापूर्वी भूमिपूजन झालेल्या तालुकापातळीवरील विक्री केंद्राचे बांधकाम दिवाळी पर्यंत पूर्ण होईल तसेच महीलांसाठी लवकरच ६० लाख रुपये किंमतीचे कॉमन फॅसिलिटी सेंटर उभारणार असल्याचा मानस खासदार प्रतापराव जाधव यांनी व्यक्त केला. काल, शेगाव येथे  महिला आर्थिक विकास महामंडळाच्या माध्यमातून महिला बचत गट उद्योजक मेळावा पार पडला यावेळी अध्यक्षस्थानावरून खा.जाधव बोलत होते. त्याआधी चिखली येथील मौनीबाबा संस्थान येथे उमेद महाराष्ट्र राज्य ग्रामीण जीवनोन्नती अभियानांतर्गत महिला स्वयंसहाय्यता बचतगटांनी उत्पादित केलेल्या वस्तूंचे विपणन मार्गदर्शन मेळावा देखील खा.प्रतापराव जाधव यांच्या उपस्थितीत पार पडला. या कार्यक्रमात देखील खा.जाधव यांनी महिला बचत गटांच्या कामाचे कौतुक करीत दिवाळीच्या आधी विक्री केंद्र आणि ६० लाख रुपयांचे कॉमन फॅसिलिटी सेंटर लवकरच सुरू करणार असल्याचा शब्द दिला...