नवरात्रोत्सव पूर्वसंध्येला रोषणाई करताना विजेचा शॉक लागून युवकाचा मृत्यू; साखरखेर्डा येथील घटना..!
Sep 22, 2025, 11:30 IST
साखरखेर्डा (बुलडाणा लाइव्ह वृत्तसेवा) :येथील वार्ड क्रमांक एकमधील देवी मंदिरावर रोषणाई करताना २३ वर्षीय युवकाचा विजेचा शॉक लागून मृत्यू झाला. नवरात्रोत्सवाच्या पूर्वसंध्येला घडलेल्या या दुर्दैवी घटनेने गावात हळहळ व्यक्त होत आहे. सतीश विटेकर (वय २३) असे मृतक युवकाचे नाव आहे.
मिळालेल्या माहितीनुसार, जालना येथील रहिवासी सतीश विटेकर हा मामा दत्ता लष्कर यांच्याकडे आला होता. वडार समाजाचे कुलदैवत असलेल्या जगदंबा माता मंदिरावर रोषणाई करण्याचे काम सुरू असताना ही दुर्घटना घडली.
मंदिराच्या परिसरातून मेहकर-साखरखेर्डा दरम्यानची ३३ केव्ही विज वाहक लाईन जात होती. सतीश मंदिरावर चढला असता चार ते पाच फूट अंतरावर असलेल्या उच्चदाबाच्या विज प्रवाहाने त्याला शॉक बसला. त्यामुळे तो खाली पडला व गंभीर जखमी झाला. तातडीने चिखली येथील उपजिल्हा रुग्णालयात नेले असता डॉक्टरांनी त्याला मृत घोषित केले.
चिखली उपजिल्हा रुग्णालयात शवविच्छेदन करून त्याचा मृतदेह जालना येथे अंत्यसंस्कारासाठी पाठविण्यात आला. या दुर्दैवी घटनेमुळे नवरात्रोत्सवाच्या पूर्वसंध्येला साखरखेर्डा गावावर शोककळा पसरली आहे.