दुर्दैवी ! विहीर बांधकाम करतांना विहिरीत पडून तरुणाचा मृत्यू; २४ तासानंतर बाहेर काढला मृतदेह! खामगावची घटना

भगवान महादेव दांदळे असे मृतक तरुणाचे नाव आहे. प्राप्त माहितीनुसार काल सकाळी १० वाजेच्या सुमारास विहिरीचे बांधकाम करत असताना भगवान तोल जाऊन विहिरीत पडला. घटनेची माहिती मिळताच ग्रामस्थांनी घटनास्थळी धाव घेतली. विहिरीत पाणी असल्याने मृतदेह बाहेर काढण्यासाठी अडचणी निर्माण झाल्या.

दरम्यान प्रशासनाकडून मदत कार्यात विलंब होत असल्याचा आरोप करीत संतप्त ग्रामस्थांनी खामगावात रास्ता रोको आंदोलन केले. त्यानंतर प्रशासनाने युद्धपातळीवर पाणी उपसण्याचे काम सुरू केले. अखेर २४ तासानंतर आज अखेर भगवानचा मृतदेह विहिरीतून बाहेर काढण्यात प्रशासनाला यश आले. मृतदेह उत्तरीय तपासणीसाठी खामगाव येथील शासकीय रुग्णालयात पाठवण्यात आला आहे.