घरातच टाकला पेट्रोलपंप!
सुरू केला पेट्रोलचा काळाबाजार? पोलिसांचा अंजनी बु. येथे धाडसी छापा; २७० लिटर पेट्रोलसह ₹३४ हजारांचा मुद्देमाल जप्त
ADVT
पोलिसांना मिळालेल्या खात्रीशीर माहितीनुसार, अंजनी बु. (ता. मेहकर) येथील भागवत रामदास लाड (वय २५) यांच्या घरावर पंचांसमक्ष छापा टाकण्यात आला. तपासणीदरम्यान कोणतीही वैध परवानगी न घेता विक्रीच्या उद्देशाने मोठ्या प्रमाणात पेट्रोलचा साठा करून ठेवण्यात आल्याचे निदर्शनास आले.
या कारवाईत पोलिसांनी २७० लिटर पेट्रोलआणि आठ प्लास्टिक कॅन असा एकूण ₹३४ हजार २६४ रुपयांचा मुद्देमाल जप्त केला. या प्रकरणी डोणगाव पोलिस ठाण्यात जीवनावश्यक वस्तू अधिनियम, १९५५ मधील कलम ३ व ७ अंतर्गत गुन्हा दाखल करण्यात आला असून पुढील तपास सुरू आहे.
दरम्यान, ग्रामीण भागात परवानगीशिवाय सुरू असलेल्या इंधन विक्रीविरोधात पोलिसांनी आता अधिक कठोर भूमिका घेतली असून अशा बेकायदेशीर इंधनसाठ्यांवर सातत्याने धडक कारवाया करण्यात येणार असल्याचा इशारा डोणगाव पोलिसांनी दिला आहे.
ही कारवाई ठाणेदार गणेश इंगोले यांच्या मार्गदर्शनाखाली डोणगाव पोलिसांच्या पथकाने यशस्वीरीत्या पार पाडली.