दहिद बु गावात अग्नितांडव! घराला भीषण आग; संसाराची राखरांगोळी! कुटुंब उघड्यावर....
Updated: Apr 20, 2025, 18:49 IST
बुलडाणा (बुलडाणा लाइव्ह वृत्तसेवा):आज दुपारी सुमारे दोनच्या सुमारास दहिद बु येथील संजय नथ्थुसिंग राजपूत यांच्या राहत्या घराला अचानक आग लागली. या आगीत संपूर्ण घर आणि संसारोपयोगी साहित्य जळून खाक झाले यात ३ लाख ३८हजार रुपयांचे नुकसान झाल्याची प्राथमिक माहिती आहे.
ही घटना इतकी भीषण होती की घरातील फ्रिज, टीव्ही, कूलर, गॅस रेग्युलेटर, सागवानी पलंग व सोफा, टिनपत्रे, रोख रक्कम१००००० रुपये, दोन तोळे सोनं आणि चांदीचे दागिने हे सर्व साहित्य आगीच्या भक्षस्थानी पडले. शिवाय डाळी, तेल, किराणा, भांडी यांसह स्वयंपाकाचे सर्व साहित्यही जळून गेले.
सुदैवाने या आगीत कोणतीही जीवितहानी झालेली नाही, मात्र सदर कुटुंब पूर्णपणे उघड्यावर आले आहे. आगीचे नेमके कारण अद्याप समजू शकले नसले तरी याबाबत पंचासमक्ष पंचनामा करण्यात आला असून पुढील मदतीसाठी अहवाल संबंधित विभागाला सादर केला जाणार आहे. संकटग्रस्त कुटुंब उघड्यावर आले असून संसाराची राखरांगोळी झाली आहे,त्यामुळे तात्काळ मदत प्रशासनाने द्यावी अशी मागणी सामाजिक स्तरातून होत आहे.