BIG NEWS : सोमठाणा तिहेरी हत्याकांडाचा थरारक ट्विस्ट! आई, भाऊ अन् पुतण्याला संपवणाऱ्या दीपक सुरडकरचे पनवेलमध्ये आत्मसमर्पण; हत्याकांडानंतर पुतणीला संपवण्यासाठीही गेला?

दरम्यान, तिहेरी हत्याकांडानंतर दीपकने संजयच्या मुलीला म्हणजेच स्वतःच्या पुतणीला संपवण्याच्या उद्देशाने दिवठाणा गाठल्याची, तसेच संजयच्या पत्नीपर्यंत पोहोचण्याचा प्रयत्न केल्याची धक्कादायक माहिती समोर येत आहे. मात्र, या घटनाक्रमाची अधिकृत पुष्टी होणे बाकी आहे.

 तिहेरी हत्याकांडानंतरही सूडाची आग?

८ ऑक्टोबर रोजी सायंकाळी सोमठाणा येथे घडलेल्या हत्याकांडात सरस्वतीबाई फत्तेसिंग सुरडकर, संजय फत्तेसिंग सुरडकर आणि रणजीत संजय सुरडकर यांचा मृत्यू झाला. या तिहेरी हत्याकांडानंतर दीपक घटनास्थळावरून पसार झाला होता. प्राथमिक माहितीनुसार, आईच्या नावावरील जमिनीचा हिस्सा आणि पेन्शनवरून दीपकच्या मनात संजयविषयी नाराजी होती. याच वादातून दोघांमध्ये अनेक दिवसांपासून कुरबुरी सुरू असल्याचे सांगितले जाते. घटनेच्या दिवशी शेतातील मोटारीच्या वायरवरून दोघांमध्ये वाद झाला होता. गावकऱ्यांनी मध्यस्थी करून हा वाद मिटवला; मात्र त्यानंतर काही तासांतच रक्तरंजित घटना घडली.

 ‘वंशाला दिवा ठेवायचा नाही’ या सूडभावनेतून पुतणीच्या घराकडे?

तिघांच्या हत्येनंतर दीपकचा राग शांत झाला नव्हता, अशी माहिती पुढे येत आहे. संजयच्या वंशाचा वारसा संपवण्याच्या उद्देशाने तो संजयची मुलगी वैष्णवी हिच्या दिवठाणा येथील घराकडे गेल्याचे सांगितले जाते. सोमठाण्यापासून सुमारे दोन किलोमीटर अंतरावरील दिवठाण्यात पोहोचला असता, वैष्णवीचे घर बंद असल्याने त्याला तिथे जाता आले नाही, अशी माहिती आहे.
त्यानंतर तो संजयच्या पत्नीला संपवण्यासाठी शेलुद येथे गेल्याचेही सांगितले जात आहे. मात्र, तिथे पोलिस दिसल्याने तो माघारी फिरल्याची माहिती समोर येत आहे. त्यानंतर तो पनवेलपर्यंत कसा पोहोचला, त्याला कोणी मदत केली का आणि त्याने आत्मसमर्पण करण्याचा निर्णय का घेतला, हे अद्याप स्पष्ट झालेले नाही.

 मुलगा जगदीशही पोलिसांच्या ताब्यात

या प्रकरणात दीपकचा २० वर्षीय मुलगा जगदीश सुरडकर यालाही पोलिसांनी ताब्यात घेतल्याची माहिती यापूर्वी समोर आली होती. हत्याकांडानंतर तो देखील फरार झाला होता, त्याला सवणा गावातून ताब्यात घेण्यात आले.
मुख्य आरोपी दीपक आणि त्याचा मुलगा जगदीश यांच्याबाबतचे आरोप, त्यांची भूमिका आणि घटनाक्रम यांचा तपासातून उलगडा होणे महत्त्वाचे ठरणार आहे. पनवेल पोलिसांकडून माहिती मिळाल्यानंतर चिखली पोलिसांचे पथक रात्रीच रवाना झाल्याची माहिती आहे. आज सायंकाळपर्यंत दीपक सुरडकरला चिखलीत आणले जाण्याची शक्यता वर्तवली जात आहे.