अख्ख्या बुलढाणा जिल्ह्याला ज्या क्षणाची प्रतीक्षा! श्री गजानन महाराजांची पालखी १८ ऑगस्टला खामगावात; दर्शनासाठी भक्तांची मांदियाळी, ‘या’ मार्गावरून होणार आगमन...

मंगळवार, १८ ऑगस्ट रोजी सकाळी हनुमान व्हिटॅमिन येथे श्रींच्या पालखीचे आगमन होणार असून, सकाळी ११ वाजता नगर परिक्रमेला सुरुवात होणार आहे. पालखीच्या स्वागतासाठी विविध ठिकाणी भक्तांकडून तयारी केली जाणार आहे.यानंतर पालखीचा मार्ग वाल्मीक चौक, विक्रमसी चौक, कृषी उत्पन्न बाजार समिती, टिळक पुतळा, अर्जुन जल मंदिर, मेन रोड, जगदंबा चौक, महावीर चौक, मोहन चौक, फरशी, महावीर भवन, एचडीएफसी बँक आणि खामगाव अर्बन बँक असा राहणार आहे.या मार्गावरून नगरपरिक्रमा पूर्ण केल्यानंतर पालखी श्री अरुण खिमजी नॅशनल हायस्कूलच्या प्रांगणात दुपारी सुमारे ३ वाजता पोहोचणार आहे.

नॅशनल हायस्कूलमध्ये पालखीचा मुक्काम

श्रींच्या पालखीचे नॅशनल हायस्कूलच्या प्रांगणात आगमन झाल्यानंतर भक्तांना श्री गजानन महाराजांचे दर्शन घेता यावे, यासाठी पालखी तेथे मुक्कामी राहणार आहे. त्यामुळे दुपारनंतरही भक्तांची मोठी गर्दी होण्याची शक्यता आहे.

बुधवारी पहाटे पुन्हा शेगावकडे प्रस्थान

पालखीचा खामगावातील मुक्काम बुधवारी, १९ ऑगस्ट रोजी पहाटे ५ वाजेपर्यंत राहणार असून, त्यानंतर श्रींची पालखी खामगावहून शेगावकडे प्रस्थान करणार आहे.पालखी खामगावहून शेगावकडे रवाना होताना देखील मार्गावर भक्तांची मोठी उपस्थिती राहण्याची शक्यता आहे.

जिल्हाभरातून भक्त खामगावात दाखल होणार

श्री गजानन महाराजांच्या पालखीचे खामगावात आगमन हा केवळ धार्मिक सोहळा नसून, बुलढाणा जिल्ह्यातील लाखो भक्तांच्या श्रद्धेचा आणि भावनेचा क्षण मानला जातो. पालखीच्या दर्शनासाठी खामगाव शहरासह जिल्ह्याच्या विविध भागांतून भाविक मोठ्या संख्येने दाखल होतात.

श्रींच्या पालखीचे आगमन, नगरपरिक्रमा, भक्तांचे दर्शन आणि त्यानंतरचा मुक्काम—या संपूर्ण सोहळ्यामुळे खामगाव शहर काही काळ अक्षरशः ‘गजाननमय’ होऊन जाते.
आज १४ ऑगस्टपासूनच भक्तांमध्ये या सोहळ्याची चर्चा सुरू झाली असून, १८ ऑगस्टच्या मंगल क्षणाची अख्ख्या बुलढाणा जिल्ह्याला उत्सुकता लागली आहे.या पवित्र सोहळ्यात भाविकांनी मोठ्या संख्येने सहभागी होऊन श्रींचे दर्शन व पालखी सोहळ्याचा लाभ घ्यावा, असे आवाहन करण्यात आले आहे.