गाय ठार करणारा बिबट्या विहिरीत तडफडून मेला; वनविभागाचे रेस्क्यू पथक वेळेत पोहचले नाही! पळशी बु. शिवारातील घटना; शेतकरी अनिल बोराळे यांच्या विहिरीत आढळला बिबट्या,

बिबट्या विहिरीत पडल्याचे लक्षात येताच शेतकऱ्यांनी तातडीने वनविभागाला माहिती दिली. बिबट्याला वाचविण्यासाठी वनविभागाच्या रेस्क्यू पथकाची प्रतीक्षा सुरू होती. मात्र, पथक घटनास्थळी पोहोचेपर्यंत बिबट्याचा विहिरीतील पाण्यात तडफडून मृत्यू झाला होता.

हिंगणा उमरा येथे गाय ठार झाल्यानंतर परिसरात बिबट्याची दहशत निर्माण झाली होती. त्यानंतर बिबट्या विहिरीत पडल्याची माहिती मिळाल्याने शेतकऱ्यांमध्ये काहीसा दिलासा निर्माण झाला होता. मात्र, बचावकार्य सुरू होण्यापूर्वीच बिबट्याचा मृत्यू झाल्याने या घटनेने आता वनविभागाच्या बचाव यंत्रणेच्या कार्यक्षमतेबाबत चर्चेला उधाण आले आहे.
वन्यप्राणी मानवी वस्त्यांच्या जवळ येण्याच्या घटना वाढत असताना अशा प्रसंगी वनविभागाने तातडीने रेस्क्यू पथक उपलब्ध करून देणे गरजेचे असल्याची भावना शेतकरी आणि ग्रामस्थांकडून व्यक्त होत आहे.