शिक्षक मतदारसंघाच्या निवडणुकीचा बिगुल! २३ ऑक्टोबरला पाच जिल्ह्यांत मतदान; ३५ हजार ८१० शिक्षक बजावणार मतदानाचा हक्क, ८१ केंद्रांवर कडेकोट बंदोबस्त! 

बुलढाण्यात ९ हजारांहून अधिक शिक्षक मतदार; जिल्ह्यात १८ मतदान केंद्रे

अमरावती विभागातील पाच जिल्ह्यांमध्ये मतदार आणि मतदान केंद्रांची विभागणी करण्यात आली आहे. बुलढाणा जिल्ह्यात ९ हजार १२४ शिक्षक मतदार असून, त्यांच्यासाठी १८ मतदान केंद्रे निश्चित करण्यात आली आहेत. जिल्हानिहाय मतदारसंख्या आणि मतदान केंद्रांची स्थिती पुढीलप्रमाणे आहे.

- अमरावती : १०,०९७ मतदार; २५ मतदान केंद्रे
- अकोला : ५,९४२ मतदार; १३ मतदान केंद्रे
- बुलढाणा : ९,१२४ मतदार; १८ मतदान केंद्रे
- वाशिम : ३,७१५ मतदार; ७ मतदान केंद्रे
- यवतमाळ : ६,९३२ मतदार; १८ मतदान केंद्रे 

या पाच जिल्ह्यांतील एकूण ३५ हजार ८१० मतदारांसाठी ८१ मतदान केंद्रांची व्यवस्था करण्यात आली आहे.

प्रत्येक केंद्रावर पाच कर्मचारी; २८ झोनल अधिकारी तैनात

मतदान प्रक्रिया सुरळीत पार पाडण्यासाठी प्रत्येक मतदान केंद्रावर पाच अधिकारी-कर्मचाऱ्यांची नियुक्ती करण्यात आली आहे. यामध्ये एक केंद्राध्यक्ष, तीन मतदान अधिकारी आणि एक पोलीस कर्मचारी यांचा समावेश आहे. याशिवाय संपूर्ण निवडणूक प्रक्रियेवर समन्वय आणि नियंत्रण ठेवण्यासाठी २८ झोनल अधिकाऱ्यांची नियुक्ती करण्यात आली आहे.मतदान केंद्रांवर मतदारांना आवश्यक सुविधा उपलब्ध करून देण्याबरोबरच मतदानासंबंधीची माहिती केंद्राबाहेर प्रदर्शित केली जाणार आहे. मतदान प्रक्रिया शांततेत पार पडावी, यासाठी पोलीस बंदोबस्तही तैनात करण्यात आला आहे.

शिक्षक मतदारांना मतदानासाठी विशेष सवलत

मतदार असलेल्या शिक्षकांना मतदानाचा हक्क बजावता यावा, यासाठी विशेष नैमित्तिक रजा जाहीर करण्यात आली आहे. मात्र, खासगी आस्थापनांमध्ये काम करणाऱ्या मतदारांना ही विशेष नैमित्तिक रजा लागू नसल्याने अशा मतदारांना मतदानासाठी चार तासांची विशेष सवलत देण्याबाबत भारत निवडणूक आयोगाने निर्देश दिले आहेत.त्यामुळे पात्र मतदारांनी मतदानासाठी उपलब्ध असलेल्या सवलतीचा लाभ घेत आपला मतदानाचा हक्क बजावावा, असे आवाहन प्रशासनाकडून करण्यात आले आहे.

मतदान केंद्राच्या २०० मीटर परिसरात प्रचारबंदी

मतदान प्रक्रिया शांततेत आणि निर्भय वातावरणात पार पडावी, यासाठी मतदान केंद्रांच्या २०० मीटर परिसरात विविध निर्बंध लागू करण्यात आले आहेत. या परिसरात सार्वजनिक किंवा खासगी जागेत ध्वनीवर्धक, लाऊडस्पीकर अथवा अन्य ध्वनिक्षेपक उपकरणे लावण्यास किंवा वापरण्यास बंदी आहे.
तसेच, राजकीय पक्षांना या परिसरात बूथ किंवा मंडप उभारता येणार नाहीत. बेकायदेशीर जमाव करणे, प्रचार करणे किंवा मतदारांना प्रलोभने दाखवून प्रभावित करण्यास प्रतिबंध घालण्यात आला आहे. भारतीय नागरिक सुरक्षा संहिता, २०२३ च्या कलम १६३ अन्वये संबंधित निर्बंध लागू करण्यात आले आहेत.

मतपेट्यांसाठी कडक सुरक्षा; २७ ऑक्टोबरला मतमोजणी

मतदान प्रक्रिया पूर्ण झाल्यानंतर मतपेट्या सुरक्षितपणे मतमोजणी केंद्रापर्यंत आणण्यासाठी स्वतंत्र वाहतूक आराखडा तयार करण्यात आला आहे. सर्व मतपेट्या अमरावती येथील लोकशाही भवनात उभारण्यात आलेल्या स्ट्राँग रूममध्ये कडक सुरक्षा व्यवस्थेत ठेवण्यात येणार आहेत.या निवडणुकीची मतमोजणी मंगळवार, २७ ऑक्टोबर २०२६ रोजी अमरावती येथील लोकशाही भवनात होणार आहे. त्यामुळे २३ ऑक्टोबरच्या मतदानानंतर सर्वांचे लक्ष मतमोजणीकडे लागणार आहे.

विभागीय आयुक्तांचे शिक्षक मतदारांना आवाहन

अमरावती विभागाच्या विभागीय आयुक्त तथा निवडणूक निर्णय अधिकारी नयना गुंडे यांनी शिक्षक मतदारांना प्राधान्याने मतदान करण्याचे आवाहन केले आहे. निवडणूक प्रक्रिया पारदर्शक आणि सुरळीत पार पाडण्यासाठी प्रशासन सज्ज असून, मतदारांनी निर्भयपणे मतदानाचा हक्क बजावावा, असे आवाहन करण्यात आले आहे.आता २३ ऑक्टोबर रोजी होणाऱ्या मतदानात शिक्षक मतदार कोणाच्या पारड्यात आपले मत टाकतात आणि २७ ऑक्टोबरच्या मतमोजणीत कोणाच्या विजयावर शिक्कामोर्तब होते, याकडे संपूर्ण अमरावती विभागाचे लक्ष लागले आहे.