दत्तपूर येथे सेवा पंधरवडा व मुख्यमंत्री समृद्ध पंचायतराज अभियानाचा उत्साहात प्रारंभ;
जिल्हाधिकारी डॉ. किरण पाटील यांची उपस्थिती; ग्रामसभेत गावकऱ्यांच्या समस्यांचे निराकरण !
Sep 18, 2025, 10:37 IST
बुलढाणा (बुलडाणा लाइव्ह वृत्तसेवा) :छत्रपती शिवाजी महाराज महाराजस्व अभियानांतर्गत पंतप्रधान नरेंद्र मोदी यांचा जन्मदिन (१७ सप्टेंबर) ते राष्ट्रपिता महात्मा गांधी यांची जयंती (२ ऑक्टोबर) या कालावधीत सेवा पंधरवडा व मुख्यमंत्री समृद्ध पंचायतराज अभियान राबविण्यात येत आहे. या अभियानाचा प्रारंभ दत्तपूर (ता.जि. बुलढाणा) येथे जिल्हाधिकारी डॉ. किरण पाटील यांच्या उपस्थितीत उत्साहात झाला.
यावेळी जिल्हाधिकारी डॉ. पाटील यांनी स्वतः ग्रामसभा घेऊन गावकऱ्यांच्या विविध समस्यांचे निराकरण केले. दत्तपूर हे जिल्हा प्रशासनाचे दत्तक गाव असून, या गावाच्या विकासासाठी त्यांनी विशेष लक्ष केंद्रित केले आहे. अभियानाच्या सुरुवातीला शिव पाणंद रस्त्याचे सर्वेक्षण करण्यात आले व त्याबाबतची माहिती चावडी वाचनाद्वारे गावकऱ्यांना देण्यात आली. तसेच ‘जिवंत ७/१२’ मोहिमेबाबत मार्गदर्शन करण्यात आले आणि घरकुलासंबंधीच्या तक्रारींचे निराकरण झाले.
याशिवाय, दत्तपूर ग्रामपंचायतीच्या वतीने जिल्हा परिषद शाळेला जिल्हाधिकारी डॉ. पाटील यांच्या हस्ते शैक्षणिक साहित्य वाटप करण्यात आले. जिल्हाधिकारी यांनी गावकऱ्यांशी संवाद साधून शासकीय योजनांचा लाभ घेण्याचे आवाहन केले.
या कार्यक्रमात जिल्हा परिषदेचे मुख्य लेखा व वित्त अधिकारी प्रकाश राठोड यांनीही गावकऱ्यांना विविध शासकीय योजनांची माहिती दिली. यावेळी दत्तपूर सरपंच संदीप कांबळे, उपसरपंच जीवन दाभाडे, सदस्य आकाश माळोदे, राहीबाई रमेश जाधव, अनिता गजानन भराड, शीतल समाधान माळोदे, भागवत वानेरे, ग्रामविकास अधिकारी नितीन इंगळे, तलाठी उषा इंगळे, मंडळ अधिकारी पायघन, सहाय्यक जाधव, पोलिस पाटील श्रीकृष्ण राऊत, भास्कर माळोदे, पोलिस जमादार तायडे, मुख्याध्यापक बबन गोरे, समुदाय आरोग्य अधिकारी अंजली चित्ते, आरोग्यसेवक सचिन चिंचोले, सुनीता वैद्य, गजानन जाधव यांच्यासह ग्रामस्थ मोठ्या संख्येने उपस्थित होते.