नवरात्रीत दांडिया नव्हे, हातात तलवार! इसरुळच्या जिजाऊंच्या लेकींची राज्यस्तरावर झेप!

जिद्द, चिकाटी अन् तलवारीच्या पात्यावर कौशल्याची चमक!

क्रीडा व युवक सेवा संचालनालय, महाराष्ट्र राज्य, पुणे, जिल्हा क्रीडा परिषद व जिल्हा क्रीडा अधिकारी कार्यालय, अमरावती तसेच अमरावती जिल्हा तलवारबाजी असोसिएशन यांच्या सहकार्याने ११ ते १३ सप्टेंबरदरम्यान अमरावती येथील डॉ. बाबासाहेब आंबेडकर महाविद्यालयात शालेय विभागीय तलवारबाजी स्पर्धेचे आयोजन करण्यात आले होते. अमरावती विभागातील पाच जिल्ह्यांतील खेळाडूंनी या स्पर्धेत सहभाग नोंदवला.या स्पर्धेत बुलढाणा जिल्ह्याचे प्रतिनिधित्व करत श्री संभाजी राजे विद्यालय, इसरुळच्या विद्यार्थिनींनी आपल्या खेळाचे उत्कृष्ट प्रदर्शन केले. मर्यादित साधने, ग्रामीण भागातील परिस्थिती आणि अनेक आव्हानांवर मात करत या मुलींनी क्रीडाक्षेत्रात स्वतःची वेगळी ओळख निर्माण करण्याच्या दिशेने महत्त्वाचे पाऊल टाकले आहे.

भक्ती कत्ते आणि कल्याणी चाळगे यांची राज्यस्तरीय भरारी!

या विभागीय स्पर्धेत वयोगट १७ वर्षांखालील गटातून कु. पूनम प्रताप भुतेकर, कु. अक्षरा गजानन भुतेकर आणि कु. पूनम हनुमान कोलते यांनी सहभाग घेतला. तर वयोगट १९ वर्षांखालील गटातून कु. भक्ती विठ्ठल कत्ते आणि कु. कल्याणी शंकर चाळगे यांनी आपले कौशल्य पणाला लावले.
या स्पर्धेतील कामगिरीच्या जोरावर भक्ती कत्ते आणि कल्याणी चाळगे यांची शालेय राज्यस्तरीय तलवारबाजी स्पर्धेसाठी निवड झाली. ग्रामीण भागातील विद्यार्थिनींनी मिळवलेले हे यश केवळ दोन खेळाडूंचे यश नसून, संधी आणि योग्य मार्गदर्शन मिळाल्यास ग्रामीण भागातील मुलीही राज्यस्तरावर आपली गुणवत्ता सिद्ध करू शकतात, याचा प्रत्यय देणारे आहे.

नवरात्रीत जिजाऊंच्या लेकींचा पराक्रम प्रेरणादायी!

नवरात्री म्हणजे स्त्रीशक्तीचा जागर. अशा उत्सवाच्या काळात इसरुळच्या मुलींनी तलवारबाजीच्या मैदानात मिळवलेले यश विशेष लक्षवेधी ठरले आहे. दांडियाच्या तालावर थिरकणाऱ्या मुलींच्या जोडीला हातात तलवार घेऊन आत्मविश्वासाने मैदान गाजवणाऱ्या या विद्यार्थिनी आजच्या सक्षम, निर्भय आणि कर्तृत्ववान मुलींचे प्रतीक ठरत आहेत.छत्रपती शिवाजी महाराजांच्या स्वराज्याची प्रेरणा आणि राजमाता जिजाऊंच्या संस्कारांचा वारसा जपणाऱ्या या विद्यार्थिनींनी आपल्या कामगिरीतून मुलींच्या सामर्थ्याची नवी ओळख अधोरेखित केली आहे. त्यांच्या या यशामुळे इतर विद्यार्थिनींनाही क्रीडाक्षेत्रात पुढे येण्याची प्रेरणा मिळणार आहे.

नितीन जेऊघाले सरांचे मार्गदर्शन मोलाचे

या खेळाडूंना विद्यालयाचे क्रीडा शिक्षक श्री. नितीन जेऊघाले सर यांचे मार्गदर्शन लाभले. विद्यार्थिनींच्या यशस्वी वाटचालीत विद्यालयाचे मुख्याध्यापक, शिक्षकवृंद आणि पालक यांचेही मोलाचे योगदान आहे. सराव, शिस्त, मेहनत आणि सातत्य यांच्या बळावर विद्यार्थिनींनी मिळवलेले हे यश विद्यालयाच्या क्रीडा परंपरेला नवी उंची देणारे ठरले आहे.
खेळाडूंच्या या यशाबद्दल चिखली विधानसभा मतदारसंघाचे माजी आमदार राहुल भाऊ बोंद्रे, कृषी उत्पन्न बाजार समितीचे सभापती, माजी सभापती अशोकराव पडघान, माजी प्राचार्य पी. एस. वायळ यांच्यासह इतर मान्यवरांनी विद्यार्थिनींचे अभिनंदन करून राज्यस्तरीय स्पर्धेसाठी शुभेच्छा दिल्या.

विभागीय स्पर्धेतून राज्यस्तरीय स्पर्धेपर्यंत मजल मारणाऱ्या भक्ती कत्ते आणि कल्याणी चाळगे यांच्याकडून आता राज्यस्तरावरही दमदार कामगिरीची अपेक्षा व्यक्त होत आहे. त्यांच्या यशाने इसरुळच्या शैक्षणिक आणि क्रीडा क्षेत्राचा नावलौकिक वाढला असून, भविष्यात या जिजाऊंच्या लेकींनी राष्ट्रीय स्तरावरही यश संपादन करावे, अशा शुभेच्छांचा वर्षाव होत आहे.ग्रामीण भागातील मुलींच्या हातात केवळ स्वप्ने नाहीत, तर ती प्रत्यक्षात उतरवण्याची जिद्दही आहे! भक्ती आणि कल्याणी यांच्या तलवारबाजीतील या भरारीने हेच सिद्ध केले आहे. श्री संभाजी राजे विद्यालय, इसरुळ परिवाराच्या वतीने दोन्ही खेळाडूंचे हार्दिक अभिनंदन आणि पुढील वाटचालीस मनःपूर्वक शुभेच्छा!