सांगितल होत लग्न दुपारी उरका! झाली ना फजिती! जिल्ह्यात ठिकठिकाणी वादळ वारा, तुफान गारपीट; वऱ्हाडी मंडळींची फजिती! हवामान अभ्यासक म्हणतात, ३ मे पर्यंत असच राहणार..
आज,२६ एप्रिलच्या दुपारपासून जिल्ह्यात अवकाळीचे मळभ दाटून आले. प्रचंड सोसाट्याचा वारा, काळेभोर आभाळ पाहून वऱ्हाडी मंडळी,वरबाप यांच्या उरात धडकी भरल्याचे चित्र ठिकठिकाणी होते. आज लग्नाची दाट तिथी असल्याने अनेक ठिकाणी विवाह सोहळे आयोजित करण्यात आलेत, मात्र सोसाट्याच्या वाऱ्याने अनेक ठिकाणचे मंडप उडून गेले. बुलडाणा तालुक्यातील डोंगरखंडाळा , भादोला, डोंगरशेवली इथे तुफान पाऊस झाला. चिखली तालुक्यातील अनेक गावांमध्ये गारपीट झाल्याचे वृत्त आहे. खामगाव, मेहकर तालुक्यात देखील तीच स्थिती आहे. अनेक गावांमध्ये गारांचा अक्षरशः खच पडलाय. ज्यांनी दुपारी लग्न उरकले त्यांचे ठीक मात्र ज्यांचे लग्न उशिरा आणि उघड्या मैदानात होते त्यांची मात्र अक्षरशः फजिती होतेय. ३ मे पर्यंत अशाच पद्धतीच्या अवकाळी पावसाचा सामना करावा लागेल असे हवामान तज्ञांचे मत आहे.