EXCLUSIVE झेडपीच्या नव्या "एचओडी" ची कर्मचाऱ्यांना नवी ऑफर! महिन्याला १००० ऐवजी एकदाच वर्षाचे १० हजार द्या...बुलडाणा झेडपीत " २ हजारांच्या कन्सेशन" ची तुफान चर्चा! 

 विश्वसनीय सूत्रांनी दिलेल्या माहितीनुसार अलीकडच्या काळात जिल्हा परिषदेच्या एका महत्वाच्या विभागाच्या "एचओडी"ने बिचाऱ्या कर्मचाऱ्यांची व्यथा आणि दुःख समजून घेत नवी ऑफर सुरू केली. आधीच्या एचओडीच्या काळात महिन्याला १००० रुपये कर्मचारी देत होते. मात्र यामुळे जनतेच्या आरोग्याची काळजी(?) घेणाऱ्या बिचाऱ्या कर्मचाऱ्यांना वर्षाला १२ हजार रुपयांचा भुर्दंड पडत असल्याची बाब संवेदनशील मनाच्या एचओडींच्या ध्यानात आली.

आपल्या कार्यालयातील कर्मचाऱ्यांच्या खिशाला बसणारी झळ एचओडींना अस्वस्थ करत होती..ही बाब संवेदनशील मनाच्या एचओडींना झोपू देत नव्हती, जेवणही त्यांना गोड लागत नव्हते..कर्मचाऱ्यांना बसणारी झळ कशी कमी करता येईल यावर त्यांनी काम करायला सुरुवात केली..अखेर त्यांना मार्ग सापडला, आणि महिन्याला १००० देण्याऐवजी वर्षांचे एकदाच दहा हजार देऊन तब्बल २ हजार रुपयांची सूट मिळवा अशी कल्पक योजना एचओडी साहेबांनी सुरू केली..लवकरच या एचओडींचा कर्मचाऱ्यांच्या वतीने जाहीर सत्कार करण्यात येणार असल्याची बातमी आहे..