दिवाळीची सुरुवात फटाक्यांच्या आतषबाजीने नव्हे, तर शिवरायांच्या चरणी नतमस्तक होऊन! सव येथील शिवप्रेमींचा आदर्शवत उपक्रम; छत्रपती शिवाजी महाराजांच्या अश्वारूढ पुतळ्याला दुग्धाभिषेक अन् महाआरती!

दीपावलीतील लक्ष्मीपूजनाच्या शुभमुहूर्तावर सव येथे छत्रपती शिवाजी महाराजांच्या भव्य अश्वारूढ पुतळ्याचे विधिवत पूजन करण्यात आले. शिवप्रेमी गोपाल जवंजाळ आणि दिनेश शेळके यांच्या हस्ते महाराजांच्या पुतळ्याला दुग्धाभिषेक करण्यात आला. त्यानंतर गोपाल जवंजाळ आणि त्यांच्या पत्नी सौ. कोमल जवंजाळ यांच्या हस्ते शिवरायांची महाआरती करण्यात आली.

दिवाळीच्या आनंदोत्सवाला शिवविचारांची जोड!

छत्रपती शिवाजी महाराज हे केवळ इतिहासातील पराक्रमी राजे नाहीत, तर स्वराज्य, स्वाभिमान, न्याय आणि लोककल्याणाचे प्रेरणास्थान आहेत. महाराजांच्या या विचारांचे स्मरण केवळ शिवजयंतीपुरते मर्यादित न ठेवता प्रत्येक सण-उत्सवातून व्हावे, या भावनेतून हा उपक्रम राबविण्यात आला.दिवाळीच्या दिवशी शिवरायांच्या चरणी अभिवादन करून त्यांच्या शौर्याला, पराक्रमाला आणि स्वराज्यनिष्ठेला वंदन करण्यात आले. धार्मिक उत्सवाला ऐतिहासिक आणि सांस्कृतिक जाणिवेची जोड देण्याचा हा प्रयत्न निश्चितच कौतुकास्पद ठरला आहे.आजच्या काळात सण-उत्सवांचे स्वरूप बदलत असताना सव येथील शिवप्रेमींनी एक सकारात्मक आदर्श घालून दिला आहे. दिवाळीच्या आनंदात आपल्या महापुरुषांचे स्मरण करणे, त्यांच्या कार्याप्रती कृतज्ञता व्यक्त करणे आणि त्यांच्या विचारांचा वारसा पुढील पिढीपर्यंत पोहोचवणे, हीच या उपक्रमामागील भावना आहे.