BIG NEWS रविकांत तुपकरांच्या अन्नत्याग आंदोलनाचा चौथा दिवस उजाडला! तब्येत प्रचंड खालावली; राज्यभरात ठिकठिकाणी संतप्त शेतकऱ्यांकडून आक्रमक आंदोलने! अकोला–हैदराबाद राष्ट्रीय महामार्गावर टायर जाळले;

 शेतकरी नेते रविकांत तुपकर बुलढाणा येथील निवासस्थानी संपूर्ण कर्जमुक्तीसाठी अन्नत्याग आंदोलनाला बसले आहेत. या आंदोलनाची धग संपूर्ण महाराष्ट्रात पसरली आहे. ठिकठिकाणी आक्रमक शेतकरी आंदोलकांकडून वेगवेगळी आंदोलने केली जात आहे. आंदोलनाच्या तिसऱ्या रात्री मेहकर आणि हिवरा आश्रम येथे तलाठी कार्यालय जाळण्याचा प्रयत्न करण्यात आला. वाशिम येथे अकोला हैदराबाद राष्ट्रीय महामार्गावर टायर जाळून सरकारच्या विरोधात जोरदार घोषणाबाजी करण्यात आली. जामनेर तालुक्यातील फत्तेपूर येथे महाराष्ट्र शासनाची टाटा सुमो गाडी पेटवून दिल्याचा व्हिडिओ व्हायरल होतो आहे. शासनाने अद्याप पर्यंत तुपकर यांच्या अन्नत्याग आंदोलनाची दखल न घेतल्याने संतप्त शेतकऱ्यांच्या भावनांचा उद्रेक होत आहे..