"बाबांनी वाढदिवसाला सायकल घेऊन देतो म्हटलं होतं..." शहीद जवानाच्या चिमुकल्या ऋग्वेदची ती इच्छा आमदार श्वेता महालेंनी केली पूर्ण!

अस्थिकलश कार्यक्रमात ऋग्वेदने सांगितली होती बाबांची आठवण...

शेलसूर येथील शहीद जवान हरिदास कापसे यांच्या अस्थिकलश कार्यक्रमावेळी आमदार श्वेता महाले उपस्थित होत्या. त्यावेळी शहीद जवानांचे चिरंजीव ऋग्वेद याने आपल्या वडिलांची एक आठवण त्यांना सांगितली होती.आपल्या वाढदिवसाला बाबा सायकल घेऊन देणार होते, असे ऋग्वेदने सांगितले होते. वडिलांनी दिलेले ते आश्वासन त्याच्या मनात कायम होते. मात्र, देशसेवेसाठी प्राणांची आहुती दिल्यामुळे वडिलांच्या हातून ती सायकल मिळण्याचे त्याचे स्वप्न अपूर्ण राहिले.ऋग्वेदच्या या आठवणीची दखल घेत आमदार महाले यांनी दिवाळीच्या निमित्ताने त्याला सायकल भेट देण्याचा निर्णय घेतला.

दिवाळीत ऋग्वेदच्या घरी पोहोचल्या श्वेताताई!

दिवाळीचे औचित्य साधून आमदार श्वेता महाले पाटील यांनी चिखली शहरातील दांडगे लेआऊट येथील शहीद हरिदास कापसे यांच्या निवासस्थानी भेट दिली. यावेळी त्यांनी शहीद जवानांच्या पत्नी ऋषाली कापसे यांच्याशी आपुलकीने संवाद साधला. कुटुंबीयांना दिवाळीच्या शुभेच्छा देत हरिदास कापसे यांच्या देशसेवेच्या स्मृतींना उजाळा दिला.याच भेटीदरम्यान त्यांनी ऋग्वेदला सायकल भेट दिली. ज्या सायकलची इच्छा ऋग्वेदने आपल्या वडिलांकडे व्यक्त केली होती, तीच इच्छा पूर्ण झाल्याने त्याच्या चेहऱ्यावर आनंद फुलला. या भेटीला शहीद पित्याच्या आठवणीची भावनिक किनार होती.

शहीद जवानांच्या कुटुंबीयांच्या पाठीशी उभे राहण्याचा संदेश...

देशाच्या रक्षणासाठी बलिदान देणाऱ्या जवानांप्रती कृतज्ञता व्यक्त करणे, त्यांच्या कुटुंबीयांच्या सुख-दुःखात सहभागी होणे आणि त्यांच्या पाठीशी उभे राहणे ही समाजाची जबाबदारी असल्याची भावना या उपक्रमामागे होती.शहीद जवानांच्या कुटुंबीयांप्रती आदर व्यक्त करण्याबरोबरच त्यांच्या आयुष्यातील छोट्या-मोठ्या आनंदाच्या क्षणांत सहभागी होण्याचा प्रयत्न आमदार महाले यांनी या भेटीतून केला.
एका चिमुकल्यासाठी सायकल ही केवळ खेळण्याची किंवा फिरण्याची वस्तू नव्हती; ती त्याच्या शहीद वडिलांनी दिलेल्या शब्दाशी जोडलेली आठवण होती. त्यामुळे दिवाळीच्या निमित्ताने मिळालेल्या या भेटीला विशेष भावनिक महत्त्व प्राप्त झाले.या भेटीप्रसंगी मुख्यमंत्र्यांचे खासगी सचिव विद्याधर महाले, बळीराम काळे, विलास चव्हाण, पाणीपुरवठा सभापती दत्ता सुसर, रोहित खेडेकर, विशाल नेमाने, युवा मोर्चाचे शहराध्यक्ष विजय वाळेकर, मुकेश पडघाण, योगेश जाधव, शार्दुल कापसे, नंदू हाडे, शैलेश कापसे यांच्यासह इतर मान्यवर उपस्थित होते.