मिरवणुकीचा डामडौल टाळला, शेतकऱ्यांच्या मदतीचा हात पुढे केला! बुलढाण्यात नाभिक समाजाचा संवेदनशील निर्णय; ५१ हजार रुपये मुख्यमंत्री सहायता निधीत देणार....!

छत्रपती शिवाजी महाराजांचे निष्ठावंत अंगरक्षक वीररत्न जिवाजी महाले यांची जयंती ९ ऑक्टोबर रोजी बुलढाणा शहरात उत्साहात साजरी करण्यात आली. सकाळी दुचाकी रॅली काढण्यात आली, तर त्यानंतर समाजाच्या नियोजित सभागृहाच्या जागेवर अभिवादन कार्यक्रम पार पडला. मात्र, यंदाच्या जयंती उत्सवात केवळ जल्लोष आणि मिरवणुकीला महत्त्व न देता संकटग्रस्त शेतकऱ्यांच्या मदतीला प्राधान्य देण्याचा निर्णय घेण्यात आला.

उत्सवाचा खर्च शेतकऱ्यांसाठी; समाजाने जपली सामाजिक बांधिलकी!

यंदा पावसाच्या तुटीमुळे राज्यातील अनेक भागांमध्ये शेतीचे मोठे नुकसान झाले आहे. विदर्भासह मराठवाड्यातील शेतकरी आर्थिक संकटाचा सामना करत आहेत. अशा परिस्थितीत उत्सवावर होणारा खर्च टाळून तो शेतकऱ्यांच्या मदतीसाठी वापरण्याचा विचार पुढे आला. वीररत्न जिवाजी महाले सार्वजनिक जयंती उत्सव समिती आणि समाजबांधवांनी एकमताने या निर्णयाला मान्यता दिली. त्यानुसार, जवळपास ५१ हजार रुपयांची मदत मुख्यमंत्री सहायता निधीत जमा करण्याचे निश्चित करण्यात आले आहे. संकटाच्या काळात शेतकऱ्यांच्या पाठीशी उभे राहण्याची भूमिका घेत नाभिक समाजाने सामाजिक संवेदनशीलतेचे दर्शन घडविले आहे.

केवळ जयंतीचा उत्सव नाही, तर सामाजिक जाणिवेचाही जागर!

महापुरुषांच्या जयंतीनिमित्त मिरवणुका, सजावट आणि विविध कार्यक्रमांवर मोठा खर्च केला जातो. मात्र, समाजातील एखादा घटक संकटात असताना उत्सवाच्या खर्चातून त्याला मदत करण्याचा निर्णय घेणे, ही निश्चितच अनुकरणीय बाब आहे. नाभिक समाजाने घेतलेल्या या निर्णयातून उत्सवापेक्षा माणुसकी मोठी असल्याचा संदेश दिला आहे.

शेतकरी हा संपूर्ण समाजाचा पोशिंदा आहे. त्याच्या कष्टाची जाणीव ठेवत संकटाच्या काळात त्याला मदतीचा हात देणे, ही सामाजिक जबाबदारी असल्याचे या कृतीतून अधोरेखित झाले आहे. त्यामुळे बुलढाण्यातील नाभिक समाजाच्या या निर्णयाचे विविध स्तरांतून स्वागत होत आहे.

शेतकऱ्यांप्रती आत्मीयता हेच आमचे कर्तव्य : दामोदरकाका बिडवे

याबाबत समाजभूषण दामोदरकाका बिडवे यांनी सांगितले की, “दरवर्षी वीररत्न जिवाजी महाले यांच्या जयंतीनिमित्त शोभायात्रा काढली जाते. मात्र, यावर्षी शेतकरी दुष्काळाने होरपळून गेला आहे. त्यामुळे मिरवणुकीवर होणारा खर्च टाळून शेतकऱ्यांना मदत देण्याचा निर्णय घेतला आहे. समाज म्हणून शेतकऱ्यांच्या पाठीशी उभे राहणे ही आपली जबाबदारी आहे. शेतकऱ्यांप्रती आत्मीयता बाळगणे हे आपले कर्तव्यच आहे.”बुलढाण्यातील नाभिक समाजाने घेतलेला हा निर्णय केवळ आर्थिक मदतीपुरता मर्यादित नाही, तर तो शेतकऱ्यांच्या दुःखात सहभागी होणाऱ्या सामाजिक जाणिवेचा प्रत्यय देणारा आहे. जयंतीच्या माध्यमातून महापुरुषांना अभिवादन करतानाच त्यांच्या विचारांना साजेशी कृती करण्याचा हा प्रयत्न इतर समाजांसाठीही प्रेरणादायी ठरू शकतो.