आ.संजय गायकवाडांच्या मतदारसंघात आ.महालेंची दणकेबाज रॅली! देऊळघाटमध्ये भाजपची ‘विकास परिवर्तन सभा’; आधीच दोन्ही आमदारांत राजकीय संघर्ष, त्यात आ.महालेंच्या सभेने चर्चांना उधाण!
बुलढाणा जिल्ह्याच्या राजकारणात आमदार संजय गायकवाड आणि आमदार श्वेता महाले यांच्यातील मतभेद काही नवे नाहीत. विविध कारणांवरून दोन्ही आमदारांमध्ये यापूर्वी आरोप-प्रत्यारोप झाले आहेत. महायुतीत सहभागी असलेल्या शिवसेना आणि भाजपच्या या दोन लोकप्रतिनिधींमधील संघर्षामुळे जिल्ह्याचे राजकारण अनेकदा तापले आहे. अशा पार्श्वभूमीवर संजय गायकवाड प्रतिनिधित्व करत असलेल्या विधानसभा मतदारसंघातील देऊळघाटमध्ये श्वेता महाले यांच्या प्रमुख उपस्थितीत विकास परिवर्तन सभा पार पडल्याने या कार्यक्रमाला राजकीय महत्त्व प्राप्त झाले आहे.
स्थानिक नागरिकांच्या पुढाकारातून आयोजित या सभेत आ.श्वेता महाले यांनी विकासाचा मुद्दा केंद्रस्थानी ठेवला. मात्र, त्यांच्या भाषणातील राजकीय मुद्दे आणि सभेला उपस्थित असलेले भाजपचे प्रमुख पदाधिकारी यामुळे या कार्यक्रमाची राजकीय वर्तुळात चर्चा होऊ शकते.
‘गाव करी ते राव काय करी’; देऊळघाटच्या विकासासाठी एकजुटीचे आवाहन!
सभेला संबोधित करताना आमदार श्वेता महाले म्हणाल्या की, देऊळघाटचा सर्वांगीण विकास साधायचा असेल, गावाचा चेहरामोहरा बदलायचा असेल, तर ग्रामस्थांनी जात, धर्म आणि पक्षभेद बाजूला ठेवून एकत्र आले पाहिजे. गावाच्या विकासासाठी सर्वांनी सामूहिक प्रयत्न करणे आवश्यक आहे. ‘गाव करी ते राव काय करी’ या म्हणीप्रमाणे गावकऱ्यांनी मनावर घेतले, तर कोणताही बदल अशक्य नाही. देऊळघाटमध्ये दर्जेदार रस्ते, पाणीपुरवठा, अंतर्गत रस्त्यांची सुधारणा, नाल्यांची व्यवस्था, जिल्हा परिषद शाळांमधून गरीब विद्यार्थ्यांना दर्जेदार शिक्षण आणि विविध समाजघटकांसाठी सभागृह अशा मूलभूत सुविधांची आवश्यकता असल्याचे त्यांनी सांगितले. या सुविधा उपलब्ध करून देण्यासाठी शासनाच्या योजनांचा लाभ प्रत्येक पात्र नागरिकापर्यंत पोहोचविण्याचा प्रयत्न करू, अशी ग्वाहीही त्यांनी दिली.
मुस्लिम समाजाच्या मुद्द्यावरून काँग्रेसवर निशाणा!
या सभेत आमदार श्वेता महाले यांनी मुस्लिम समाजाच्या राजकीय, सामाजिक आणि शैक्षणिक विकासाचा मुद्दा उपस्थित करत काँग्रेसवर गंभीर आरोप केले. काँग्रेसने मुस्लिम समाजाचा केवळ मतांसाठी आणि सत्तेसाठी वापर केला. मात्र, सत्ता मिळाल्यानंतर या समाजाच्या शैक्षणिक, सामाजिक आणि आर्थिक उन्नतीसाठी अपेक्षित काम केले नाही, असा आरोप त्यांनी केला. काँग्रेसने दोन समाजांमध्ये दरी निर्माण करण्याचे राजकारण केल्याचाही आरोप महाले यांनी केला. मुस्लिम समाजाने अशा राजकारणामागील हेतू ओळखून विकासाच्या मुख्य प्रवाहात सहभागी व्हावे, असे आवाहन त्यांनी केले.
मुख्यमंत्री देवेंद्र फडणवीस यांच्या नेतृत्वाखालील सरकार सर्व समाजघटकांना समान विकासाच्या संधी उपलब्ध करून देत असल्याचा दावा त्यांनी केला. धाड येथे मुस्लिम समाजासाठी ५० लाख रुपयांच्या निधीतून शादीखाना उभारण्यात आल्याचे उदाहरण देत त्यांनी चिखली मतदारसंघातील विकासकामांचाही उल्लेख केला. घरकुलासह विविध शासकीय योजनांचा लाभ देताना कोणताही भेदभाव केला जात नसल्याचे त्यांनी सांगितले.
दुष्काळग्रस्त शेतकऱ्यांसाठी देऊळघाटकरांचा मदतीचा हात!
राज्यातील दुष्काळी परिस्थिती आणि शेतकऱ्यांच्या अडचणींचाही आमदार महाले यांनी आपल्या भाषणात उल्लेख केला. स्वतः शेतकरी असूनही संकटात सापडलेल्या इतर शेतकरी कुटुंबांसाठी देऊळघाटच्या ग्रामस्थांनी मुख्यमंत्री सहायता निधीला मदत केली, याबद्दल त्यांनी ग्रामस्थांचे विशेष कौतुक केले. संकटाच्या काळात एकमेकांच्या पाठीशी उभे राहण्याची ही भावना समाजासाठी आदर्श असल्याचे त्या म्हणाल्या.गावाच्या विकासासाठी केवळ सभा घेऊन उपयोग नाही, तर प्रत्येक नागरिकाने विकासाच्या प्रक्रियेत सक्रिय सहभाग नोंदवला पाहिजे. गावातील प्रश्न सोडवण्यासाठी सातत्यपूर्ण पाठपुरावा आणि सामूहिक प्रयत्न आवश्यक असल्याचे त्यांनी स्पष्ट केले.
भाजपच्या प्रमुख पदाधिकाऱ्यांची उपस्थिती!
या सभेला भाजप जिल्हाध्यक्ष विजयराज शिंदे, भाजप अल्पसंख्याक आघाडीचे इद्रिस मुलतानी, प्रदेश सचिव सलीम भाई घाणीवाले, भाजप जिल्हा महामंत्री दत्ता पाटील, जिल्हा उपाध्यक्ष चंद्रकांत बरदे, शहराध्यक्ष मंदार बाहेकर, तालुकाध्यक्ष सतीश पाटील, अल्पसंख्याक आघाडीचे सचिव सलीम भाई परवेज, मुन्ना बेंडवाल, जिल्हा सचिव नारायण हेलगे, मुकुंद देशपांडे, कौस्तुभ पाटील, राजेश पाठक, नंदू लवंगे, नगरसेवक आकाश दळवी, महमंद अकील भाई, हरी नारायण गायकवाड, नीलकुमार बंगाळे, कार्यक्रमाचे आयोजक रिझवान खान, समीर खान यांच्यासह ग्रामस्थ मोठ्या संख्येने उपस्थित होते.
देऊळघाटच्या सभेचा राजकीय अर्थ काय? चर्चांना उधाण!
देऊळघाटची ही सभा स्थानिक नागरिकांनी व भाजपच्या अल्पसंख्यांक आघाडीने आयोजित केली असली, तरी तिच्या राजकीय पार्श्वभूमीकडे दुर्लक्ष करता येणार नाही. एका बाजूला बुलढाण्याचे आमदार संजय गायकवाड आणि चिखलीच्या आमदार श्वेता महाले यांच्यातील मतभेद चर्चेत आहेत, तर दुसऱ्या बाजूला गायकवाडांच्या मतदारसंघात महाले यांनी भाजपच्या प्रमुख पदाधिकाऱ्यांच्या उपस्थितीत विकास परिवर्तन सभेला संबोधित केले आहे.विशेष म्हणजे, सभेच्या नावातच ‘परिवर्तन’ हा शब्द असल्याने त्याचे राजकीय अर्थही लावले जाऊ शकतात. मात्र, या सभेचा उद्देश स्थानिक विकासाचा असल्याचे आयोजकांकडून सांगण्यात आले असून, त्यामागे कोणती स्वतंत्र राजकीय रणनीती आहे, हे स्पष्ट झालेले नाही.अशा परिस्थितीत देऊळघाटमधील या सभेकडे आमदार संजय गायकवाड आणि त्यांच्या समर्थकांकडून कसे पाहिले जाते, याकडेही राजकीय वर्तुळाचे लक्ष असेल. विकासाच्या मुद्द्यावर झालेली ही सभा आगामी काळात बुलढाणा विधानसभा मतदारसंघातील राजकीय चर्चांना नवे वळण देणार का, हा प्रश्न मात्र उपस्थित झाला आहे.